20º Aniversario Atribuisaun Premio Nobel ba Paz, ba Dr.José Ramos Horta & Bispo D.Carlos Filipe Ximenes Belo,SDB

 

Iha Fulan Outubru tinan 1996, Komite Nobel fó Premio Nobel da Paz ba Timor oan nain rua, Dr.José Ramos Horta nudar porta Voz Resistência Timorense iha rai liur no Bispo D.Carlos Filipe Ximenes Belo,SDB, Bispo Diocese de Dili.

Atribuisaun Premio Nobel da Paz ne´e, halo transformasaun bóot iha Diplomacia Internasional ba kasu Timor-Leste. Akontesimentu istorika ne´ebe iha ninia influensia bóot ba Diplomacia Kasu Timor-Leste iha mundu Internasional.

Imprensa Internasional, husi jornais hanesan New York Time,Washington Post,The Guardin,TVs Mundu nian hanesan CNN, BBC, Sky News, sel-seluk tan fó destake ba Premio no análise klean ba problema Timor-Leste nian.

Iha kampu Diplomacia nian, muda rai barak ninia posisaun, liliu rai sira ne´ebe mak tradisional apoiantes ba Rejime Soeharto hahu muda sira nia posisaun, tanba faktores barak,maibe habadak ba buat rua deit.

Ida;  Imprensa hahu koalia konaba situasaun real Timor-Leste,hahu kontabiliza danus humanos ne´ebe Povu Timor-Leste ho Invasaun Indonesia no komplexidades husi rai ocidente sira;

Rua;  rai sira apoiantes Indonesia, hetan presaun husi sira nia populasaun, liliu Sociedade Civil ne´ebe organizada, halo presaun ba sira nia Politikus sira, liliu ba Governu sira atu presiona ba Governu Soeharto respeito ba Direito Internacional no Direito Auto-determinasaun Povu Maubere nian;

Husi parte Indonesia nian, ho Atribuisaun Premio Nobel ba Paz, ba Dr.José Ramos Horta no Bispo D.Carlos Filipe Ximenes Belo, SDB, loke mos matan povu Indonesia nian, liliu ba movimentu pro-demokrasia sira, hahu haksesuk konaba Lian Timor-Leste, hahu deskobre ona, interese geoestratejia no potensias sira nia hakarak no ambisaun mak halo Invasaun ba Timor-Leste.

Impaktu ba povu Timor-Leste mak, hasae moral povu nian,atu iha nafatin determinasaun ba luta ba Indepedencia, toó hetan Liberdade liu husi Konsulta Popular  iha loron 30 Fulan Agosto tinan 1999.

Hanoin hikas tinan 20 atribuisaun Premio Nobel ba dr. José Ramos Horta ho D. Carlos Filipe Ximenes Belo, SDB, iha Dili, Timor-Leste sei selebra ho konferensia ho presensa Premios Nobel sira, hanesan Nobel ba Ekonomia, Nobel ba Fisika, Medicina no premios Nobel ba Paz Timor-Leste nian mak Dr. José Ramos Horta no D.Carlos Filipe Ximenes Belo,SDB, nudar anfitriaun ba selebrasaun ne´e.

Programa mak sei iha serimonia solene ne´ebe sei preside rasik husi Presidente da Republica, Taur Matan Ruak iha loron 7 fulan Outubro tinan 2016 ho abertura oficial iha Palacio Presidencial hahu tuku 9 dader. Programa sei fahe ba temas hanesan:justiça, paz no demokrasia, Bem-Estar, ciencia no teknolijia, ekonomia no mikrofinansas. Hola parte iha programas mak Universidades sira hanesan: UNTL, DIT no UNPAZ!

 

Haksesuk Bola !