Xanana Tun Direita Prepara Fatin Transmisaun Portugal vs França

DILI, HAKSESUK BOLA, EURO2016 França-Lider historiku Timor Leste, Maun Boot Kay Rala Xanana Gusmão, iha Sabadu (9/7/2016) tun direita ho ekipa Sekretariu Estadu Politika Formasaun Profesional Empregu (SEPFOPE) no seluk tan, iha Centro Convenção Dili (CCD), Caicoli, Dili. Hodi prepara fatin transmisaun ba Final EURO 2016, entre Portugal vs França.

Maun Bo’ot Xanana ne’ebe kuñesidu hanesan fanatiku bola ba klube Benfica husi Portugal ne’e, ho antuziasmu tebes tun iha CCD hodi observa direita preparasaun fatin transmisaun ba publiku, ne’ebe oras ne’e prepara namanas hela husi ekipa SEPFOPE nian no ho ekipa sira seluk.

Iha CCD, hahu hamos fatin  no pinta ho koru mutin ba parede sira atu uza layar boot hodi asisti Final Portugal ho França. Nune’e mos, observasaun husi HAKSESUK BOLA hatudu katak, ekipa SEPFOPE no seluk tan mos alende hadia prepara layar boot iha CCD laran, iha mos layar boot ida iha CCD nia liur.

Prezensa Maun Boot Xanana iha fatin ne’ebe dudu liu tan ekipa sira ne’ebe halao hela servisu, hodi badinas servisu lais liu tan, tanba jogu atu hahu ona iha Segunda (11/7/2016) dader tuku 4:00 oras Timor Leste nian, iha Timor Leste no mundu tomak sei asisti jogu Final EURO 2016 entre ekipa nasional rua, Portugal vs França.

Timor Leste hanesan Nasaun ida iha mundu ne’ebe ninia ema kuaze maioria sai adeptus ba ekipa nacional Portugal. Realidade hatudu, bainhira kuandu Portugal hetan Vitoria husi ekipa nacional sira seluk, Timor Leste mos selebra festa boot hodi lori bandeira Portugal halo caravan, ezemplu Dili sai nakdoko kuandu Portugal halakon Wales hodi hakat ba Final, iha Kinta (7/7/2016) foin lalais ne’e’e.

(HAKSESUK BOLA)

 Foto: Media SEPFOPE