Xanana ho Adeptus Portugal Festa Iha Dili

DILI, HAKSESUK BOLA, EURO2016 França-Vitoria ne’ebe ekipa nacional Portugal hetan iha Segunda (11/7/2016), sai mos vitoria ba adeptus Portugal iha Timor Leste.

Ne’eduni, hafoin jogu termina, lider historiku Timor Leste Maun Boot Kay Rala Xanana Gusmão mos kaer bandeira Portugal akompanha ho bandeira nacional Timor Leste hamutuk ho adeptus sira seluk halo caravana/pawai hadulas Kapital Dili.

Prezensa Maun Boot Xanana nian iha caravana halo adeptus Portugal iha Timor Leste senti kontenti liu tan, tanba iha lider historiku ida mak selebra festa Vitoria Portugal nia camptionato EURO 2016.

Laos halo Caravana hamutuk deit ho adeptus sira, Maun Boot Xanana mos asisti transmisaun direta Final Portugal vs França hamutuk ho Timor oan kuaze rihun ba rihun iha Centru Convensaun Dili (CCD), ne’ebe mak Maun Xanana rasik antes ne’e tun hodi halo preparasaun ba fatin layar lebar ne’e.

Maun Boot Xanana mos kuñesidu nudar adeptus/fans ba klube Benfica Portugal, ne’eduni Vitoria Portugal nian hanesan Vitoria Benfica no Vitoria Portugal hanesan Vitoria ba familia boot CPLP, inklui Timor Leste.

Reasaun ida ne’e monstra dala ida tan katak, Portugal Timor Leste iha relasaun Maun Alin ne’ebe metin teb-tebes, hotu-hotu kaolia lian Portugues no mos hanesan familia boot iha CPLP, tanba Timor Leste mos nudar membru CPLP.

Taxa EURO 2016 nudar primeiru taxa ne’ebe Cristiano Ronaldo hetan hamutuk ho ekipa nacional Portugal, durante ninia kareira professional.

(HAKSESUK BOLA)