Vitoria Portugal, Festa Iha Dili

DILI, HAKSESUK BOLA, EURO2016 França-Ekipa nacional Portugal ofisialmente hakat ba faze ikus kompetisaun EURO 2016 nian mak Final, hafoin hetan vitoria 2-0 husi Wales, Kinta (7/7/2016) dader ne’e.

Ho Vitoria ne’ebe Cristiano Ronaldo ho nia kolega sira hetan, halo Timor Leste i liu-liu capital Dili sai nalihun ho adeptus no fans Portugal ne’ebe lori bandeira Portugal hodi halo selebra festa manan nian, ho pawai hadulas Dili laran hahu husi Becora to’o Tasi-Tolu.

Reasaun kontenti husi adeptus Portugal ne’e hahu kedas iha minutu 50, bainhira melhor jogador iha mundu Cristiano Ronaldo marka golu ba Wales, hahu rona ona lian husi adeptus sira nia hakilar viva Portugal, motor no kareta nia lian komesa makas dadaun ona. I liu deit minutu 3 ka iha minutu 53 akontese tan golu Nani nian, estrada Dili laran hahu pawai dadauk ona ho bandeira Portugal ne’ebe kesi ho bandeira nacional Timor Leste nian.

Hafoin remata minutu 90, manu nia lian kokorek iha dader domina ona husi ema, motor no kareta nia lian, ne’ebe halo Kapital Dili sai nakonu ho adeptus Portugal.

Iha Estrada ninin sira nakonu ho adeptus Portugal no iha Estrada klaran iha movimentasaun motor no kareta husi adeptus Portugal sira, hodi espresa sai sentiment kontenti ba sira nia ekipa hakat ba Final hodi hein ekipa rua Alemanha kontra França, se mak sei tuir ba Portugal iha Final. Parabens Cristiano Ronaldo, parabens Portugal, parabens adeptus Portugal iha Timor Leste.

 (HAKSESUK BOLA)

Foto: HB