Sekretariadu Estadu ba Juventude no Desportu

Leovigildo da Costa Hornai

Leovigildo da Costa Hornai
Sekretariu Estadu Juventude Desportu (SEJD)

Vizaun no Misaun SEJD

Vizaun: Juventude Timor-Leste nudar sidadaun no lideres siviku, iha abilidade, responsabilidade, saudavel, iha espiritu kompetitivu no orgulhu nudar Ema Timor-Leste.

Misaun: Dezenvolve Juventude Timor-Leste atu sai sidadaun no lideres siviku, iha abilidade, responsabilidade, saudavel, espiritu kompetitivu no orgulhu nudar Ema Timor-Leste, ho konsidera Juventude nudar pilar dezenvolvimentu no responsavel ba futuru, atravez estruturada politika, sistema no programa nasional ba juventude.

Natureza; Sekretaria Estadu ba Juventude no Desportu, ne’ebé temi badak katak SEJD, maka hanesan órgaun sentrál Governu nian ho nia misaun maka atu konsebe (hasai hanoin), ezekuta, koordena no avalia polítika ne’ebé Konsellu Ministrus define no aprova, ba áreas promosaun bein estár ho dezenvolvimentu juventude, edukasaun fízika no desportu.

Atribuisoens; Para halao nia misaun, maka SEJD kaer kompetencias hanesan tuir mai nee:

-Propoen ba Governu liñas orientasaun polítika SEJD nian no elabora projetus regulamentasaun ne’ebé presiza iha âmbitu Juventude no Desportu;

-Asegura implementasaun ho ezekusaun kuadru legál no regulamentadór ba atividades relasiona ho Juventude no Desportu;

-Promove, ho koordenasaun ho entidades kompetentes sira seluk, atividades ba jovens sira liu-liu iha kampu desportu, arte no kultura;

-Estabelese mekanizmus kolaborasaun no koordenasaun ho órgauns seluk Governu nian no sociedade civil nebe kaer responsabilidade iha áreas nebe liga malu ka hanesan atu implementa politika nacional juventude;

-Estabelese mekanizmus kolaborasaun ho organizasoens sosiedade sivíl nebe ho responsabilidade iha áreas juventude no desportu, iha níveis nasionál no internasionál, atu promove interkâmbiu kulturál;

-Kria mekanizmus apoiu no finansiamentu ba projetus jovens sira nian;

-Kria mekanizmus ba dezenvolviementu koñesimentu no promove nia divulgasaun/publikasaun ba juventude sira, liu hosi meius komunikasaun;

-Halao funsoens seluktán ne’ebé presiza hodi kumpri SEJD nia misaun.

-Halao knaar seluk ne’ebé lei haruka. (fonte SEJD)

 

 

HISTORIA SEJD

Nasaun Timor-Leste hahu forma governu definitivu iha 20 de Maio 2002 no Iha inisiu governasaun RDTL Sekretariadu Estadu ba Juventude no Desportu establese hamutuk ho Ministeriu Edukasaun no Kultura. Tuir mai hare katak area servisu juventude no desportu ne’e area bo’ot no persija strutura ketak ida hodi tau matan ba ida ne’e. Nune’e iha 2004, hases tiha Juventude no Desportu husi Ministeriu Edukasaun no Kultura. Konsiderasaun ne’e foti tanba populasaun barak liu mak juventude no isu sira juventude nian sempre tama ba area hotu, inklui saude, kultura, edukasaun, no empregu. Iha rekoinesementu bo’ot katak planu dezenvolvementu nasional tenki liga ba juventude, liu-liu juventude nia partisipasaun. Hatu’ur SEJD ho strutura ketak husi Ministeriu Edukasaun tan hare katak iha importansia bo’ot atu programa dezenvolvementu juventude konsentra liu-liu, ba dezenvolve sensu paatriotismu no nasionalismu. Strutura organizasaun SEJD efetivamente establese iha 2002 no ho establesementu SEJD ne’e konfirma interese luta ba ukun rasik an nian no estadu foun ninian ba juventude, inklui desportu. SEJD nebe iha periodu governu anterior iha rekursu minimu liu nune’e la konsege implementa programa barak no la konsege hatan ba nesesidades hotu-hotu husi joven feto no mane iha area oin-oin.

Dezemvolvimentu iha area juventude no desporto hetan mós atensaun hosi governasaun momentu ne’ebá. Ida ne’e hatudu hosi estabelesimentu Ministeriu Edukasaun, Cultura, Juventude no Desporto (MECJD) ne’ebé kaer hosi Señor Armindo Maia. Maske MECJD ninia atensaun maka’as liu ba setór edukasaun, maibe hahu dadauk mós oinsa organiza lalaok dezemvolvimentu juventude no desporto. Hanesan ita hotu hatene katak iha organizasaun juventude barak mak moris iha tempu rezistensia nunee mós iha tempu ukun rasik an. Organizasaun juventude hirak ne’e presija tebtebes atensaun hosi governu atu oinsa sira mós belen tulun governu hodi kontribui ba paz no estabilidade. Iha tempu ne’ebé governu (MECJD) mós halo parseiru ho organizasaun juventude ho karáter oioin, liu-liu ho Concelho Nacional da Juventude Timor-Leste (CNJTL) nudar orgaun sumbriña ba organizasaun juventude hothotu.

Iha parte desporto nian, maske sedauk hatudu ninia formatu lolos atu hahu hosi ne’ebé programa dezemvolvimentu desporto ne’e, maibe hahu tau dadauk ona pasu importante iha liña kordenasaun ho organizasaun desportivas hodi hasoru iventu sira, iha nasional no mós internasional. Tinan 2000, wainhira Timor-Leste iha hela faze tranzisaun laran, harii ona Confederação do Desporto de Timor-Leste (CDTL) ho objetivu atu halibur hotu desportista sira ne’ebé komesa dadauk halibur an iha federasaun desportivas.

Hare ba volume servisu iha area dezemvolvimentu juventude no desporto ne’ebé kada tinan aumenta, nunee mós realidade iha terenu katak ezizensia kona ba atividades juventude no desporto mai hosi organizasaun juventude no federasaun desportiva sira, “obriga” dunik MECJD atu separa tiha servisu aréa juventude no desporto. Bazeia ba kontestu ne’e iha tinan 2004, hahu haketak area Juventude no Desporto hosi Ministeriu Edukasaun no Cultura, no mosu nudar instituisaun ida ho naran Secretaria de Estado da Juventude e do Desporto. Desizaun ida ne’e foti mós tamba tuir realidade katak 75% hosi total populasaun iha Timor-Leste mayoria ema foinsa’e (hare rezultadu census populasaun 2004) ho komplexidade problema iha nebá.

Desizaun hodi haketak Secretaria de Estado da Juventude e Desporto (SEJD) hosi MECJD mós bazeia ba rezolusaun Concelho do Ministro iha tinan 2003 no nomeia Señor Virgilio Smith hanesan primeiru pessoa ne’ebé asumi kargu nudar Secretário de Estado da Juventude e Desporto. Iha tempu ne’e, nudar instituisaun nurak, SEJD iha deit diresaun nasionál ida ho naran Diresaun Nasionál da Juventude e Desporto. Númeru funsionariu ne’ebé mak apoia iha instituisaun ida ne’e hamutuk ema 20. Servisu principal ne’ebé hala’o durante tempu nebá mak hahú konsolida orgaun juventude ho atividade kapasitasaun no treinamentu. Nunee mós hahú tau dadauk ona plataforma Polítika Nasionál Juventude. Durasaun servisu Señor Smith nian to’o fulan Maio tinan 2005.

SEJD nudar orgaun estadu nian, komesa hatudu tan pasu importante iha tempu Señor Jose Manuel Fernandes tinan 2005 wainhira simu kna’ar nudar Secretário de Estado da Juventude e Desporto hodi troka Señor Virgilio Smith. Hare hosi postúra instituisaun, bele deskobre ona oinsá SEJD kontinua dezemvolve an institusionalmente hodi bele atende no akomoda servisu tuir nesesidade iha tempu nebá. Dezemvolvimentu institusional ne’e bazeia ba volume servisu ne’ebé aumenta, nunee presija haluan tan diresaun balun, hodi bele iha mekanismu fahe servisu. Iha lideransa Señor Jose Manuel Fernandes hatur tan Diresaun Nasional importante 3 (tolu) mak hanesan: (1) Diresaun Nasionál Administrasaun no Finansas (DNAF); (2) Diresaun Nasionál Juventude (DNJ); no (3) Diresaun Nasionál Desporto (DND). Diresaun Nasionál hirak ne’e hatur tuir organograma ne’ebé mak iha no sedauk kobre mós ba Departamentu sira. Konsekuensia hosi habelar estrutura SEJD ne’e afeta mós ba númeru funsionariu no orsamentu. Pontu importante ida mós mak SEJD ninia liña responsabilidade diretamente ba Gabinete Primeiru Ministru bazeia ba Dekretu Lei No.10/2005.

Programa servisu importante ne’ebé mak SEJD hala’o durante lidera hosi Señor Jose Manuel Fernandes hanesan hari’i Centru Juventude iha Distritu 4 (haat) Bobonaro, Oe-cusse, Ermera no Manufahi, kontinua hala’o kapasitasaun no treinamentu lideransa ba juventude sira, apoia material desporto, hala’o jogo amizade iha Soe-NTT, realiza atividade rekreativu hanesan konsertu musical no konkursu vocal group. Servisu importante tebes nebe hatu’ur alserse ba dezenvolvementu instituisaun SEJD mak servisu hamutuk ida ho UNICEF hamosu ona esbosu ba Politika Nasionál Juventudeno esbosu Lei Organika SEJD nian rasik. SEJD iha tempu neba halo ona kooperasaun ho Banku Mundial, liu husi Projeitu LED, fo suporta ba formasaun ba lideransa juventude nian, suporta ba kongresu distrital CNJTL nian no mos studu kona ba mapeamentu organizasaun juventude iha Timor – Leste. Lideransa Señor Jose Manuel Fernandes nudar Secretário de Estado liu mós hosi II (Segundo) Governu Konstitusional (fulan juñu-Outubro 2006 no III (terceiru) Governu Konstitusional (fulan Outubro tinan 2006-fulan Juñu 2007) to’o ikus remata iha meiadu tinan 2007. Iha tempu ne’e atividades SEJD afetadu mós hosi krize politiku no militar 2006. Wainhira resultadu eleisaun revela mudansa poder governasaun nian SE Jose Manuel Fernandez husik hela ninia portfolio ba governasaun tuir mai.

Refere ba rezultadu Elisaun Parlamentar 2007, Prezidente Repúblika DR. José Ramos Horta fó poder ba governu AMP (Aliansa Mayoria Parlamentar) hodi lidera governasaun ne’e tuir mandatu Konstituisaun República Democrática de Timor-Leste (RDTL). Governu AMP forma hosi partidu politiku 5 (lima) mak hanesan CNRT, PD, PSD, ASDT, no Undertim ne’ebé hetan mayoria iha kadeira Parlamentu Nasional nunee hahoris governasaun ne’e hodi ukun durante tinan lima (5) nia laran. IV Governu Konstitusional ne’e forma iha fulan Agostu 2007. Ir. Miguel M.G. Manetelu simu kna’ar nudar Secretário de Estado da Juventude e Desporto ba periodo 2007-2012, no simu posse iha 12 Agostu 2007 hosi Sua Excellencia Prezidente Repúblika. Sekretariu Estadu Ir. Miguel M. G. Manetelu hetan fiar husi Governu AMP ba kaer portfolio Juventude no Desportu iha 2007. Tempu ida nebe dezafia tebes ba lider se deit mak kaer ukun kona ba saida iha Timor – Leste. Maibe memoria instituisaun balun sei existi iha lideransa sira liu ba iha area juventude no desportu. Memoria institusional importante nebe hatudu dalan ba kontinuasaun lideransa SE Manetelu nian mak Esbosu Pulitika Nasional Juventude no Esbosu Lei Organika SEJD. Wainhira SE Manetelu komesa hala’o ona ninia kna’ar iha edifisio SEJD Villa Verde Dili, hahu buka atu kompriende no hatene instituisaun refere liu hosi troka imprensoins ho funsionariu sira. Ho nunee mak bele hatene situasaun servisu iha SEJD laran, no prepara planu asaun anual bazeia ba politika IV Governu Konstitusionál kona ba areas Juventude no Desporto.(fonte SEJD)