Taça 12 Novembru, Karketu Dili FC Manan Carsae FC

DILI, Haksesuk Bola- Ekipa Karketu Dili FC manan ekipa Carsae FC ho skoru 1-0, Kinta (11/8/16) iha Stadium Munisipal Dili. Nune’e, ekipa Karketu Dili FC otomatikamente hakat ba faze tuir mai iha kompetisaun Taça 12 Novembru 2016 ne’e.

Husi derota ne’ebe ekipa Carsae FC ne’e hetan, maka ekipa ne’e tenki haksoit sai husi kompetisaun Taça 12 Novembru nian, tanba iha kompetisaun ne’e uza sistema, ekipa ne’ebe lakon tenki hela no ekipa ne’ebe manan mak bele avansa ba oin (sistem gugur-read).

Iha jogu ne’e ekipa rua hotu-hotu hatudu ninia jogu ne’ebe diak, tanba ekipa rua hatun ninia jogador diak sira hotu iha kompetisaun ne’e. Nune’e jogu ne’e la’o iha primeira parte 45 minutu nia laran ho anima tebes adeptus bola sira, liu husi kontra atake ba malu husi ekipa rua, maibe iha primeira parte rasik laiha golu ida mak akontese husi ekipa rua no termina ho skoru 0-0.

Tama ba segunda parte, ekipa rua hasai tan ninia tempu jogu nian, hodi hadau malu dominante iha meiu kampu, ho hadau malu ida ne’e mak halo ekipa Karketu Dili FC mos konsege hatama golu ida ba ekipa Carsae FC, liu husi jogador Jose Vides (6) iha minutu 68 hodi lori ekipa Karketu Dili FC hakat ba faze tuir mai.

Oras ne’e dadaun iha ona ekipa balun ne’ebe hakat antes ona ba faze tuir mai mak hanesan, ekipa AITANA FC, AD.SLB, ASSALAM FC no YMCA FC.

Taça 12 Novembru 2016 sei fanun Timor oan tomak, atu hanoin hikas fila fali ba loron 12 fulan Novembru 1991, hanesan loron importante ida iha historia nasional Timor Leste nian, basaa, liu husi manifestasaun iha loron ida ne’e mak Timor oan sira, liliu foin sa’e sira, fanu Komunidade Internasional nia neon no dada hikas sira nia atensaun mai iha problema Timor Leste nian.

Manifestasaun ne’ebe la’o ho pasifiku iha loron 12 fulan Novembru tinan 1991 nakfila iha violensia ho fakar ran ne’ebe provoka husi forsa okupante Indonesia sira. Iha loron ne’e, militar Indonesia sira oho ema foin sa’e sira hamutuk atus resin ne’ebe kuñesidu ho Massacre 12 de Novembro ou Massacre de Santa-Cruz.

Haksesuk Bola (HB)

Foto; Media Karetu Dili FC