Povu Timor Apoiu Portugal Manan Taxa EURO 2016

DILI, HAKSESUK BOLA, EURO2016 França-Estadu no Governu lori povu Timor Leste nia naran fo apoiu ba Portugal atu manan, taxa EURO 2016, iha Segunda (11/72016) dader ne’e kontra ekipa uma nain França iha Final.

Observasaun Jornalista Haksesuk Bola iha Kapital Dili hatudu katak, jestu apoiu husi povu Timor Leste ba Portugal ne’e liu husi panfleitu boot ida ne’ebe iha Palacio do Governu nia oin ho hakerek, “O Povo de Timor Leste deseja a Portugal a nesta grande FINAL EURO 2016”.

Nune’e mos iha Centru Convensaun Dili (CCD) iha mos panfletu hanesan i infeita ho bandeira Portugal no bandeira Timor Leste, ne’ebe fatin refere mos hili ona atu halo transmisaun direita ba publiku Final EURO 2016 entre Portugal vs França.

Iha Kapital Dili laran, maske udan monu rai hela maibe iha adeptus Portugal nafatin entusiasmu hahu husi labarik kiikoan to’o bo’ot, lori bandeira Portugal, hodi hamrik iha dalan ninin sira no mos halo caravana hadulas Dili laran, hodi hakilar “Viva Portugal no mos Viva Cristiano Ronaldo”.

Reasaun apoiu ba ekipa nacional atu manan taxa EURO 2016, laos mai husi deit labarik, jovens, katuas no ferik sira. Maibe inklui mos lider Timor Leste, hanesan Maun Boot Kay Rala Xanana Gusmão, Jose Ramos Horta no sira seluk tan.

Ho reasaun husi Maun Boot Xanana nian ne’ebe tun loron rua iha CCD hodi prepara fatin transmisaun direita ba Final Portugal vs França, motiva liu tan Timor oan sira hodi espresa sira nia apoiu ba ekipa nacional Portugal.

Mezmu uluk Portugal ukun Timor Leste, maibe ohin loron Timor Leste hamrik hanesan Nasaun Soberano ne’ebe ninia relasaun ho Portugal diak tebes hanesan Maun ho Alin. Timor Leste mos hanesan Komunidade Lusofonia (CPLP) ne’ebe bele dehan Timor Leste nia relasaun ho Portugal mos especial tebes ho CPLP, nune’e mos iha Timor Leste nia lian uza mos Portugues.

Hare husi ida ne’e, Timor Leste hanesan Nasaun ida iha mundu ne’ebe ninia ema kuaze maioria sai adeptus ba ekipa nacional Portugal, bainhira Portugal manan laos festa deit iha Portugal, maibe festa mos iha Timor Leste.

“Portugal sei foti taxa EURO 2016 no Portugal sei halo historia iha mundu, tanba uluk Portugal lakon uluk ona Yunani iha 2004, ne’eduni ne’e oportunidade ba Portugal atu sai campionato. Hau fiar Ronaldo sei hatama golu no lori ekipa nacional Portugal sai campionato,”haktuir adeptus Portugal iha Timor Leste, Domingos da Cruz ba Haksesuk Bola iha CCD, Domingo (10/7/2016).

Domingos dehan tan, Portugal mos antes ne’e joga ona ho klube boot sira hanesan Argentina iha jogu amizade no ikus mai Portugal manan, nune’e mos iha torneu ida ne’e Portugal kontinua hadia ninia kualidade, ne’ebe fiar katak, taxa EURO 2016 sei monu iha Portugal nia liman.

(HAKSESUK BOLA)

 Foto: Haksesuk Bola