Numeru 7 Infeita Ronaldo Ba Final

DILI, HAKSESUK BOLA, EURO2016 França-Numeru hitu (7) hanesan numeru ida ho sorte, ho numeru 7 ne’e bele infeita Cristiano Ronado ne’ebe kuñesidu ho naran bolu CR7 hakat ba Final, tanba Portugal manan iha loron 7, fulan 7 (tangal 7 no bulan 7).

CR7, tanba Ronaldo hatais faru ho numeru hitu (7) bainhira tama iha kampu hodi joga bola, tantu iha klube no mos iha ekipa nacional.

Loron 7 fulan 7 tiann ida ne’e marka historia ba fans CR7 nian iha mundu tomak no inklui Timor Leste, CR7 konsege lori ninia ekipa hakat ba Final EURO hafoin halakon Wales iha Semi Finais ho 2-0, ne’ebe Ronaldo hatama golu ida no assist ida ba Nani nia golu.

“Ronaldo hatais faru numeru tuju (7) ne’e la saugate ida, tanba ohin tangal tuju ( loron 7), bulan tuju (fulan hitu 7), nia lori Portugal ba Final, maske durante ne’e ema hotu la konfia Portugal. Mas ohin Ronaldo hatudu ba mundu, Portugal mos bele foti piala EURO ne’e,”koalia adeptu Portugal Abreu de Sousa ba Haksesuk Bola ho oin midar no kontenti, iha Timor Plaza nia oin, Dili, hafoin Portugal halakon Wales, Kinta (7/7/2016) hodi hakat ba Final.

Adeptu Portugal ne’e dehan tan, CR7 ne’e uniku iha mundu no iha numeru ne’ebe Ronaldo hatais sorte sempre akompanha no hanesan fans Portugal fiar Ronaldo sei kontinua lori Portugal hakat ba oin no sei manan EURO iha França.

CR7 ho naran kompletu Cristiano Ronaldo dos Santos Aveiro, moris iha Funchal, Madeira, Portugal iha loron 5 Fevereiru 1985 (tinan 31). Numeru 7 ne’ebe Ronaldo uza ne’e, hahu kedas bainhira nia sei joga iha klube Manchester United no agora dadaun kontinua uza iha Real Madrid, ho numeru ne’e mos lori ona Ronaldo hodi manan taxa barak hamutuk ninia klube sira no mos eleitu sai melhor jogador iha mundu ba dala tolu (3).

(HAKSESUK BOLA)

 Foto: REUTERS/Carl Recine