Neymar Lori Brasil Hakat Ba Semi Final

DILI, Haksesuk Bola-Melhor Jogador Brasil Neymar JR lori ninia ekipa Nasional hakat ba Semi Final Torneiu Olimpico Rio 2016, hafoin halakon ekipa Nasional Colombia ho skoru 2-0, iha Domingu (14/08/2016).

Ekipa nasiona Brasil ne’ebe sai favoritu iha torneiu Olimpico ne’e, domina tebes ba ekipa Nasional Colombia iha jogu Quarto Final ne’ebe hala’o iha Stadium Arena Corinthians, São Paulo, Brasil.

Jogador jovens famozu Neymar loke skoru Brasil iha minutu 12, liu husi bola mate ne’ebe marka husi Neymar rasik no la konsege salva husi guarda rede Colombia, Cristian Bonilla no skoru 1-0 iha primeira parte.

Brasil ne’ebe jogu ho agresivu no halo kontra atakes makas ba Colombia, so bele hatama tan golu ba dala rua iha minutu  83, segunda parte nian liu husi jogador Luan hodi kompleta skoru 2-0 ba Brasil hakat ba Semi Final kontra ekipa Nasional Honduras ne’ebe manan ekipa Nasional Coréia Do Sul ho skoru 1-0. No iha parte seluk, Nigéria manan Dinamarca 2-0, ne’eduni iha Semi Final Nigéria sei hasoru ekipa Nasional Alemanha ne’ebe antes ne’e manan Portugal 4-0.

Brasil sai favoritu ba Torneiu ne’e, tanba mai ho melhor jogador hanesan Neymar ne’ebe joga iha klubu boot Europa nian, Barcelona. Nune’e mós Brasil sai favoritu ba Torneiu ne’e, tanba jogu iha ninia uma rasik, iha Brasil.

Ekipa Brasil mos foti Torneiu ne’e hanesan oportunidade ida atu anima no halo kontenti fali publiku Brasil, ne’ebe antes ne’e iha tinan 2014 la konsege foti Taça Kompa Mundial, ne’ebe realiza iha Brasil. Ne’eduni Torneiu ida ne’e ba Brasil hanesan mai atu kura kanek ne’ebe Neymar ho nia kolega sira hasoru iha tinan 2014 liu ba.

HAKSESUK BOLA (HB)

Foto: Getty Images/Alexandre Schneider