Messi La Joga, Dezafiu Boot Ba Argentina

DILI, Haksesuk Bola-Melhor Jogador Mundu dala lima (5) Lionel Messi sei la hola parte iha ekipa nasional Argentina iha jogu rua tuir mai. Tuir Treinador Argentina, Edgardo Bauza, ida ne’e nudar dezafiu boot ba Argentina.

Melhor jogador Barcelona no Argentina ne’e tenke husik hela kampu iha semana hirak nia laran, tanba aliza ne’ebe hetan bainhira reforsa ninia klube Barcelona hasoru Atletico Madrid  iha 21 Setembru liu ba.

Ho situasaun ida ne’e, ekipa nasional Argentina obrigado tenke lakon Messi iha jogu kualifikasaun Kopa Mundial, maske ida ne’e laos foin primeira ves ba Argentina joga la ho Messi. Maibe Treinador Argentina senti katak, laiha Messi iha ekipa nasional, ne’e hanesan dezafiu boot ida ba ninia ekipa.

“Joga la ho ami nia melhor jogador (Lionel Messi-read), ida ne’e nudar dezafiu boot ida ba ami. Hau hein katak, nia bele joga fila fali bainhira ami hasoru ekipa nasional Brasil no Kolombia (iha fulan Novembru-read),”hateten Bauza iha Soccerway.

Argentina sei joga hasoru uma nain ekipa nasional Peru iha loron 6 Outubru 2016, no tuir mai sei hasoru ekipa Nasional Paraguay iha loron 16 Outubru 2016. Maske laiha Messi, maibe Argentina sei lori nafatin jogador sira ho naran boot hanesan Gonzalo Higuain, Sergio Aguero no Paulo Dybala. Argentina agora dadaun okupa terseiro lugar (III) iha kualifikasaun Kopa Mundial 2018 iha zona CONMEBOL ho pontus 15 lakon pontus ida husi ekipa nasional Uruguay hanesan primeiru lugar, i ekipa nasional Brasil okupa segundu lugar ho pontus hanesan ho ekipa nasional Argentina.

HAKSESUK BOLA (HB)

Foto: Reuters