Jogador TL Fila Dili Nakdoko

DILI, HAKSESUK BOLA,-Timor oan kuaze rihun ba rihun, kompostu husi estudantes Universitariu Timor Leste husi UNTL, UNPAZ, UNDIL, DIT, IOB, UNITAL, CRISTAL, estudantes Secundaria, Presecundaria, primaria no seluk tan, halo Dili sai nakdoko ho Caravana ho Jagador Timor Leste ne’ebe fila hikas husi Singapura.

Iha Kinta, (21/7/2016) maizomenus iha tuku 12 ho balun Oras Timor Leste, jogador Timor Leste to’o iha Aeroportu Internasional Nicolau Lobato Comoro, Dili, simu husi Sekretariu Estadu ba Apoiu no Promosaun Sosiu-Ekonomiku Veneranda Lemos nudar mos Sekretariu Estadu Juventude no Desportu (SEJD) Interina, Xefe Gabinete SEJD Cedaliza Soares dos Santos, Reitor Universitariu, Koordenador FDATL Ricardo Ribeiro, i marka mos prezensa husi eis Prezidente Republika Timor Leste, José Ramos Horta.

Iha aeroportu ne’ebe nakonu ho ema no bandeira RDTL no Universitariu sira nian, iha mos panfletu ne’ebe ho hakerek, “imi nia luta mak haklean universitariu no povu Timor Leste nia dignidade” no hakerek tan “Imi nia susesu mak esperitu unidade nian ne’ebe hari forsa horsehik, ohin no aban bainrua”.

Iha tuku 13 liu Oras Timor Leste, Caravana/pawai ho jogador Timor oan sira no atleta sira seluk hahu sai husi Aeroportu hodi lao hadulas capital Dili laran, iha Caravana laran ne’ebe hetan seguransa maximu husi Policia Nacional Timor Leste ne’e, adeptus bola Timor Leste hakilar ho lian makas, “Viva Timor Leste no Viva jogador Timor oan”.

Ekipa Lafaek ninia prezensa iha torneu ASEAN University 2016 iha Singapura, hatudu rezultadu ida diak hodi hamorin Timor Leste nia naran, tanba sai nudar segundu (20) lugar ba eventu internasional refere, hafoin lakon ho ekipa Thailand 3-0 ne’ebe sai hanesan kampionato.

Rezultadu ida ne’e, lori ona orgulho boot ba publiku Timor Leste, tanba hanesan Nasaun foun, kontinua hatudu ba publiku Internasional katak, Timor Leste mos bele hakat ba oin, tanba iha eventu internasional refere Timor Leste bele halakon Nasaun boot sira hanesan, Malaysia, Brunei, Laos no sira seluk tan hodi hakat ba Final no ikus mai lakon ho Thailand.

Rezultadu husi eventu internasional ASEAN University Games ne’e hatudu katak, modalidade futebol Timor Leste okupa fatin nudar 20 lugar no modalidade atletizmu hetan medalha osan mean ida (1) no medalha osan mutin rua (2).

(HAKSESUK BOLA)

Foto: HB