Independensia Catalunha ninia impaktu ba partisipasaun El Barça iha La Liga

Barcelona. Ho referendum ba Independensia Catalunha neébe mak halao iha loron 01 fulan Outubru tinan 2017, ho resultadu povu Catalão sira vota ba independensia, hanesan aspirasaun popular. Maske referendum neé la hetan aseitasaun husi  Estadu Espanhol neébe konsidere nudar Referendum neé inkonstitusional. Leurai Filipe VI nudar Xefi Estadu Espanha nian iha ninia diskursu ba Nasaun haktuir no klasifika, “rai catalunha no autoridade sira des-leal ho estado Espanha”.

Ba adeptus bola sira iha mundu no liliu adeptus El-Barça  sira ninia preokupasaun mak ekipa FC Barcelona la partisipa iha kompetisaun La Liga neé, ninia impaktu bót tebes.

Tuir kronika neébe mak hakerek husi kontributor Haksesuk Bola iha London, Ingris, AFAF iha ninia kronika konaba, “Referendum ba independensia Catalunha afeta ba kampionatu Espanhol (Journal HB, numeru 13 no 14, pajina 2)“.

 Cita AFAF, (…) “Politika ho futebol soke-malu. Prezidente Liga de Fútbol Profesional (LFP), Javier Tebas, nega hasoru kedas possibildade ne’e (deklarasaun COC), i nia deklara kedas katak klubu catalães sei la hetan permisaun atu joga iha kampionatu nasional se rejiaun nordeste Espanha ne’e haketak-an unilateralmente iha referendum fulan Outubru ne’e. “… hau dehan katak Barcelona sei la escolha atu joga iha sa klubu deit se hili ukun rasik-an. Se existi prosesu unilateral, sei la joga iha Liga Espanhola”, afirma Tebas, ne’ebe rejeita moz adiamentu jogu Barcelona vs Las Palmas, nebe kalender tiha ona ba dia 1 Outubru iha Camp Now, paslos ho loron referendum”.  Kronika AFAF nian bele sani fali iha edisaun journal Haksesuk Bola numeru 15, pajina 2.

Kampionato Espanhol néebe konese ho designasaun «La Liga» ninia kompetitividade no ninia emosaun la hanesan ona, wainhira ausensia ka la iha El-Barça. Tanba pratika futebol neébe atrativu no kompetisaun neébe dada adeptus bola iha mundu tomak sente falta ba FC Barcelona la envolve iha kompetisaun La Liga. Lian litik ka pergunta mak neé: Maske Catalunha Independente baseia ba referendum, bele ka lae EL-Barça partisipa iha kompetisaun La Liga? Hein pergunta mai husi adeptus bola sira, tanba iha esperiensia husi rai balun, liliu kompetisaun League 1 France nian, As Monaco bele hola parte maske laos pertense ba Estado Frances ka Republica Francesa. Haksesuk Bola