Ibrahimovic Hatama Golu, MU Lidera Premier League

DILI, Haksesuk Bola-Manchester United (MU) hahu jornada primeiru Premier League 2016/17 ho rezultadu pozetivu, manan ekipa Bournemouth ho skoru 3-1 no hakat ba lidera provizoriu Premier League.

Jogu ne’ebe hala’o iha Domingo (14/08/2016) kalan ne’e, iha stadium Bournemouth nian, ekipa Jose Mourinho domina tebes iha meiu kampu hodi la fo oportunidade ba ekipa Bournemouth, nune’e antes termina primeira parte, Jogador Juan Mata halo golu ida iha minutu 40 nia laran hodi lori ekipa Manchester United lidera ho skoru 1-0.

Tama ba segundu parte, Manchester United kontinua dominante hodi hatama tan golu rua husi jogador Wayne Rooney iha minutu 59 no Jogador foun Manchester United nian Zlatan Ibrahimovic iha minutu 64. Entertantu ekipa Bournemouth konsege hatama golu animasaun ida ba Manchester United liu husi jogador Adam Smith iha minutu 69, nune’e rezultadu ikus husi minutu 90 nia laran, Manchester sai hanesan manan nain ho skoru 3-1.

Ho skoru ida ne’e, maka lori ona ekipa Jose Mourinho ne’e ba lidera provizoriumente Premier League tinan ida ne’e.

HAKSESUK BOLA (HB)

Foto: REUTERS/Hannah McKay