Hamorin TL Iha AUG 2016, Caravana Simu Jogador

DILI, HAKSESUK BOLA,-Hafoin partisipa iha eventu internasional ASEAN University Games (AUG) ba dala 18, iha Singapura, Kinta (21/7/2016) ne’e ekipa Lafaek fila hikas mai Timor Leste no tuir planu sei simu ho Caravana hadulas Dili.

Ekipa Lafaek ninia prezensa iha torneu ASEAN University Games 2016 iha Singapura, hatudu rezultadu ida diak hodi hamorin Timor Leste nia naran, tanba sai nudar segundu (20) lugar ba eventu internasional refere, hafoin lakon ho ekipa Thailand 3-0 ne’ebe sai hanesan kampionato.

Rezultadu ida ne’e, lori ona orgulho boot ba publiku Timor Leste, tanba hanesan Nasaun foun, kontinua hatudu ba publiku Internasional katak, Timor Leste mos bele hakat ba oin, tanba iha eventu internasional refere Timor Leste bele halakon Nasaun boot sira hanesan, Malaysia, Brunei, Laos no sira seluk tan hodi hakat ba Final no ikus mai lakon ho Thailand.

Ho esforsu ne’ebe jogador sira halo hodi hamorin Timor Leste nia naran  iha mundu, maka VI Governu Timor Leste liu husi Sekretariu Estadu Joventude no Desportu mos hasai ona karta ida ba Universitariu sira no ba publiku husu atu simu jogador sira iha Aeroportu no sei halo Caravana hadulas Dili laran.

Tuir karta ne’ebe HAKSESUK BOLA asesu Kuarta (20/7/2016) ne’e katak, objektivu husi karta ne’e maka konvida estudantes tomak no publiku atu festeza hamutuk ho jagador Timor oan ne’ebe ba ona partisipa eventu internasional ASEAN University Games iha Singapura, iha dia 7 Jullu liu ba.

Rezultadu husi eventu internasional ASEAN University Games ne’e hatudu katak, modalidade futebol Timor Leste okupa fatin nudar 20 lugar no modalidade atletizmu hetan medalha osan mean ida (1) no medalha osan mutin rua (2).

Jogador Timor oan sei to’o iha Timor Leste iha Kinta (21/7/2016), tuku 11: 30, hodi halo konferensia imprensa no halo konvoiu iha Dili, hodi festeza Timor Leste nia Vitoria ne’e hamutuk.

 (HAKSESUK BOLA)