Guardiola vs Mourinho Iha Premier League

DILI, Haksesuk Bola-Premier League 2016/17 jornada primeiru hahu ona iha Domingo (14/08/2016), adeptus bola tomak iha mundu ninia matan hare ba melhor treinador mundu nain rua, Josep Guardiola vs Jose Mourinho, ne’ebe  agora dadaun kaer hotu klube Ingris nian.

Josep Guardiola lidera klube Manchester City, no Jose Mourinho lidera klube Manchester United. Iha klube rua ne’ebe lokalija hamutuk iha sidade ida deit, mak sidade Manchester nudar sidade boot iha Ingris nian.

Treinador nain rua ne’e ho ninia CV (Curiculum Vitae-read) hanesan Treinador la lakon malu, Josep Guardiola nudar treinador ne’ebe manan ona Taça barak ho klube boot sira iha Europa hanesan Barcelona no Bayer Munchen.

Entertantu Treinador Jose Mourinho nudar Treinador ne’ebe sempre iha ambisaun liu atu manan Taça i ida ne’e hatudu durante nia kaer klube boot sira iha Europa hanesan, Inter Milan, Chelsea no Real Madrid.

Konaba teknika jogu nian, Josep Guardiola sempre kaer metin liu jogu tiki taka ho pasajen badak ka bolu jogu bonito hodi domina bola iha kampu laran. I Treinador Jose Mourinho iha ninia prinsipiu hanesan Treinador kaer metin liu mak halo kontra atakes ida makas no defeza metin. Tanba ne’e, iha kompetisaun Taça Premier League 2016/17 sei rame tebes, tanba adeptus bola sira laos atu hare deit ba teknika jogu husi melhor jogador sira, maibe sei hare mos tatika husi Treinador naran boot sira hanesan Josep Guardiola no Mourinho, ne’ebe antes ne’e hasoru malu ona iha Spanyol, Josep Guardiola kaer Barcelona no Jose Mourinho kaer Real Madrid, iha El Clasico, ne’ebe dala barak Treinador nain rua ne’e lansa kritika makas ba malu ho linguajen oioin.

Ho situasaun kompetisaun manas ne’ebe antes ne’e Treinador nain rua halo ona iha El Clasico, iha Premier League nudar fatin bad ala rua Treinador nain rua ne’e atu halo kompetisaun dala ida tan.

Oras ne’e dadaun Treinador rua lori ninia ekipa hotu-hotu manan iha jornada primeiru, ekipa Guardiola Manchester City manan Sunderland 2-1, no ekipa Mourinho Manchester United mos manan Bournemouth 3-1 ne’ebe lori Manchester United ba lidera Premier League iha jornada primeiru i ba Manchester City okupa pozisaun quarto.

Publiku hein, entre Treinador nain rua ne’e, se mak iha ikus mai sei lori ninia ekipa hodi sai kampionato iha Premier League 2016/17 ou sira nain rua la sai kampionato hotu ho sira nia ekipa. Tanba iha premier league tinan ida ne’e mos iha Treinador famozu seluk ne’ebe mos ninia CV la lakon dok hanesan, Antonio Conte (Chelsea), Klopp (Liverpol), Wenger (Arsenal), Pochettino (Spurs) no Ranieri (Leicester City).

HAKSESUK BOLA (HB)

Foto; Spesial