Guardiola vs Mourinho, Derbi Manchester Hanesan“El Clasico”

DILI, Haksesuk Bola-Kompetisaun boot iha Premier League 2016/17, sei akontese iha Sabadu 10 semana ida ne’e, klube boot rua Manchester City ho Manchester United sei hasoru malu iha Stadium Old Trafford (MU uma nain-read). I ida ne’e hanesan kompetisaun boot entre Treinador famozu nain rua, Josep Guardiola vs Jose Mourinho.

Klube boot rua ne’e hasoru malu hanaran Derbi Manscheter, tanba klube rua ne’e lokalija hotu iha sidade Manchester. Ho prezensa Josep Guardiola ho Jose Mourinho halo Derbi Manchester sei iha mosu kompetisaun manas hanesan mos El Clasico iha Spanyol bainhira Barcelona vs Real Madrid.

Iha jogu tolu liu ba ne’ebe klube boot rua halao ona ho rezultadu ne’ebe posetivu, tanba Josep Guardiola ho Jose Mourinho ida-idak lori ninia klube manan hotu kedas no rekolha ona pontus 9, maske pontus hanesan, maibe Manchester City mak iha direitu ba lidera provizoriu Premier League tanba golu barak liu, Manchester United okupa terseiro lugar hafoin Chelsea iha segundu lugar.

Adeptus bola iha mundu tomak ninia matan sei foka liu ba Josep Guardiola ho Jose Mourinho, ne’ebe  agora dadaun kaer hotu klube Ingris nian. Josep Guardiola lidera klube Manchester City, no Jose Mourinho lidera klube Manchester United.

Treinador nain rua ne’e ho ninia CV (Curiculum Vitae-read) hanesan Treinador, la lakon malu, Josep Guardiola nudar treinador ne’ebe manan ona Taça barak ho klube boot sira iha Europa hanesan Barcelona no Bayer Munchen.

Entertantu Treinador Jose Mourinho nudar Treinador ne’ebe sempre iha ambisaun liu atu manan Taça i ida ne’e hatudu durante nia kaer klube boot sira iha Europa hanesan, Inter Milan, Chelsea no Real Madrid.

Konaba teknika jogu nian, Josep Guardiola sempre kaer metin liu jogu tiki taka ho pasajen badak ka bolu jogu bonito hodi domina bola iha kampu laran. I Treinador Jose Mourinho iha ninia prinsipiu hanesan Treinador kaer metin liu mak halo kontra atakes ida makas no defeza metin. Tanba ne’e, iha kompetisaun Taça Premier League 2016/17 sei rame tebes, tanba adeptus bola sira laos atu hare deit ba teknika jogu husi melhor jogador sira, maibe sei hare mos tatika husi Treinador naran boot sira hanesan Josep Guardiola no Mourinho, ne’ebe antes ne’e hasoru malu ona iha Spanyol, Josep Guardiola kaer Barcelona no Jose Mourinho kaer Real Madrid, iha El Clasico, ne’ebe dala barak Treinador nain rua ne’e lansa kritika makas ba malu ho linguajen oioin.

Ho situasaun kompetisaun manas ne’ebe antes ne’e Treinador nain rua halo ona iha El Clasico, iha Premier League, hotu-hotu hein se los maka sei manan iha jogu derbi Manchester agora ne’ebe nudar derbi primeiru ba Treiandor nain rua.

HAKSESUK BOLA (HB)

 Foto; Spesial