Exklusivu ho Anche Cabral: Orgulho Lori Timor-Leste nia naran iha Jogo Olimpico Rio 2016

 

Haksesuk Bola (HB) dada lia ho Ancha Cabral (AC) atleta Timor oan ne´ebe kompete iha Olimpico Rio 2016 iha modalidade ciclismo ´´Cros country Olimpico´´.  Tuir mai HB dada lia ho AC liu Facebook.

HB: Povo no Nasaun Timor-Leste tau fiar ba ita boot nudar respresentante Timor-Leste iha Jogo Olimpico Rio 2016. Saida mak ita sente?

AC: Nudar Timoroan neebe representa Timor-Leste iha jogos Olympico nee urgulho. Sente kontente tebes hanesan siklista primeiru neebe hetan konvite special husi NOC neebe aseita husi UCI.

HB: saida mak ita sente wainhira lori estandarte ho bandeira Nacional Timor-Leste tama iha arena Olimpico, mundu tomak akomapa husi Estadiu Maracana no mos husi transmisaun direta TV  cerimonia abertura Olimpico Rio 2016  ba mundu tomak??

AC: Nunee mos atu presenta atleta ou delegasaun Timor nian hodi bandeira Timor-Leste, nee sentimentu ida neebe diferente, kontente los tanba hau bele lori bandeira no hau sei la haluha momentu spesial ida nee iha hau nia moris maibe hau mos hakarak halo buat ruma atu labele haluha konaba Timor-Leste momentu nee. Hau hakarak hatudu ba mundo katak hau kontente reprensenta hau nia rain hatudu liu husi hamnasa midar no uza oportunidade nee diak atu promove Timor-Leste iha momentu nee tanba ida nee mak nasaun hotu mai hamutuk iha fatin ida nee no mundo hotu tau matan.

HB: Hahu huri bainhira mak Anche Cabral dedika ba modalidade ´´ Cros Country Olimpico´´ ne´e?

AC: Hau komesa MTB iha 2009 bainhira hahu fofoun Tour de Timor maibe nee MTB Marathon. Mas hau hahu ho cross country nee iha 2013 Mak hau foin envolve an iha XCO – (Cross Country Olympic).

HB: Bele konta witoan ba publiku Timor-Leste em jeral, liu husi Haksesuk Bola, oinsa mak procesu Anche Cabral alkansa ninia mehi ba to´o Rio de Janeiro hola parte iha festa boot desportivu mundial nian maka jogo Olimpico?

AC: Oinsa hau bele hetan oportunidade ida nee, hanesan iha leten hau dehan katak hau hetan konvite espesial atu tuir event boot ida nee. Iha proposta husi Federação no Comitte Olympico sira hatoo maibe mos haree ba pontos nebe hetan nee, hetan eventu event Cross Coutry husi UCI  (Uniao Ciclismo International) hafoin sira halo desizaun hodi konvida. tanba momentu neba hau hetan pontos 84 no urutan 318 iha mundu, mas agora  tanba hau seidauk tuir eventu, tan nunee pontos Nafatin 84 maibe posisaun tun ba urutan 325 no semenetara iha Timor pontos ida nee mak áas liu point nee bele hetan husi nee:
http://mtbcrosscountry.com/riders/francelina-cabral/

 

HB: Anche Cabral ninia partisipasaun hetan apoios moral, material no financeirus husi instituisaun ruma, individus ka seluk?

AC: Hau agradese boot ba suporta hotu neebe hau hetan: Husi Governo atraves husi Comitte Olympic ba no Federação neebe haruka hau ba tuir eventu International UCI hodi kolekta ponto. Hau nia agradece special ba Kompanhia Romante nebe mos suporta finanseiru no ba kolega hotu nebe tau osan ba Crowdfund atraves husi kolega Nick McClean nebe kria pagina crowdfund hodi suporta hau mai iha eventu boot ne´e, mak  McClean. Hau mos agradese ba kolega Benfica Basketball feto nebe ho idea mos halo fundrasing hamutuk ho Timor Plaza ho sira nia  inisiativa rasik nomos ba kolega no familia hotu nia suporta,  ho motivasaun hotu hau agradese no hau hakarak expressa katak hau kontente tebes ho imi nia suporta tomak, IMI MAK HAU NIA FORSA. Obrigada barak no hau hadomi imi hotu! Viva Timor Leste hau hakarak dehan deit katak hau hetan suporta husi parte individual barak nebe hau sei la temi sira nia naran maibe hatene sira hotu ninia suporta.

HB: Espetetativa Anche Cabral nian ba  kompetisaun rasik, meta saida mak Anche cabral atu atinji?

AC: Atu dehn deit katak Perkursu ba XCO nee Olympic duni ho pista neebe defisil tebes hau tuir eventu balun iha parte Asia maibe nee diferente tebes pista nebe ho ninia defikuldade áas no ohin ami komesa no aban tan ba kompetisaun ita lahatene saida mak akontenese durante competisaun iha Rute ida hanesan nee,  mas hau hakarak dehan katak ´´ I WILL DO MY BEST AS I CAN´´. Maibe ho honestu hakarak dehan katak Rute nee la fasil maibe hau kontente atu bele hetan pista hanesan nee, nee hatudu katak XCO ne la fasil hansan ita halai tuir estrada los deit.

HB: Povo no Nasaun Timor-Leste tomak, fó fiar ba Anche Cabral iha kompetisaun ne´e. Saida mak Anche Cabral ható ba sira,  liu husi Haksesuk Bola?

AC: Obrigada barak ba imi Nia fiar, hau esforsu tuir hau forsa nebe hau iha. Obrigada barak!