Brasil vs Alemanha Iha Final

DILI, Haksesuk Bola-Ekipa nasional Brasil sei hasoru ekipa nasional Alemanha (Jerman-read) iha Final Torneio Olimpico Rio 2016.

Ekipa nasional Brasil ne’ebe sai favoritu iha torneio Olimpico ne’e, hakat ba Final hafoin halakon ekipa Honduras ho skoru boot 6-0, Kinta (18/08/2016).

Tanba domina iha meiu kampu, Brasil mos halo golu barak tebes ba Honduras, golu husi ekipa Brasil nian marka husi jogador Neymar iha minutu 1 no 90, Gabriel Jesus iha minutu 26 no 35, Marquinhos iha minutu 51 no Luan iha minutu 79.

Iha sorin seluk, ekipa nasional Alemanha manan ekipa nasional Nigéria ho skoru 2-0, golu husi ekipa nasional Alemanha marka husi jogador Lukas Klosterman iha minutu 9 no Nils Petersen iha minutu 89.

Ida ne’e nudar oportunidade primeiru ba ekipa nasional rua, atu manan medalha osan mean iha futebol Olimpico tinan ida ne’e.

Brasil sai favoritu ba Torneiu ne’e, tanba mai ho melhor jogador hanesan Neymar ne’ebe joga iha klubu boot Europa nian, Barcelona. Nune’e mós Brasil sai favoritu ba Torneiu ne’e, tanba jogu iha ninia uma rasik, iha Brasil.

Ekipa Brasil mos foti Torneiu ne’e hanesan oportunidade ida atu anima no halo kontenti fali publiku Brasil, ne’ebe antes ne’e iha tinan 2014 la konsege foti Taça Kompa Mundial, ne’ebe realiza iha Brasil. Ne’eduni Torneiu ida ne’e ba Brasil hanesan mai atu kura kanek ne’ebe Neymar ho nia kolega sira hasoru iha tinan 2014 liu ba.

Jogu final ba Brasil vs Alemanha tuir orariu sei monu iha loron Sabadu (20/08/2016) iha Stadium Maracana, Brasil.

HAKSESUK BOLA (HB)

Foto: REUTERS/Bruno Kelly