Brasil ho Portugal Favoritu Hadau Malu Osan Mean Olimpico

DILI, Haksesuk Bola-Ekipa nasiona Brasil ho Portugal sai favoritu iha torneio Olimpico, iha Rio de Janeiro Brasil, ne’ebe agora dadaun la’o hela, atu hadau malu osan mean.

Brasil ho Portugal, oras ne’e hakat ona ba faze quarto-final Torneio Futebol Olimpico Rio 2016, hafoin hakat liu iha faze apuramentu nian.

Brasil sai favoritu ba Torneio ne’e, tanba mai ho melhor jogador hanesan Neymar ne’ebe joga iha klubu boot Europa nian, Barcelona. Nune’e mós Brasil sai favoritu ba Torneio ne’e, tanba jogu iha ninia uma rasik, iha Brasil.

Ekipa Brasil mos foti Torneio ne’e hanesan oportunidade ida atu anima no halo kontenti fali publiku Brasil, ne’ebe antes ne’e iha tinan 2014 la konsege foti Taça Kompa Mundial, ne’ebe realiza iha Brasil. Ne’eduni Torneio ida ne’e ba Brasil hanesan mai atu kura kanek ne’ebe Neymar ho nia kolega sira hasoru iha tinan 2014 liu ba.

Entertantu husi sorin seluk, ekipa nasional Portugal mai iha Torneio Olimpico ho fiar metin maske la lori ninia jogador diak sira, tanba iha foin lalais, ekipa nasional Portugal ne’ebe lidera husi melhor Jogador Mundu Cristiano Ronaldo konsege marka historia ba Portugal, hodi foti EURO 2016 iha França.

Ne’eduni, iha Torneio Olimpico Rio 2016 ne’e, maske Portugal mai ho ninia jogador mesak jovens deit, maibe ekipa husi treinador Rui Jorge ne’e hatudu sira nia prestasaun jogu ne’ebe diak iha faze apuramentu hodi manan Argentina 2-0, ida ne’e hatudu katak, Portugal mos favoritu ba torneio ida ne’e.

Iha jogu Quatro-Final, ekipa nasional Brasil sei hasoru malu ho ekipa nasional Colombia iha Domingo (14/8/16) no ekipa nasional Portugal sei hasoru ekipa nasional Alemanha iha Sabadu (13/8/16).

HAKSESUK BOLA (HB)

 Foto; EVARISTO SA/AFP